Urtarrilaren 21ean lehen bisita egin zuten Arabako hiriburura, eta astelehen honetan, hilaren 25ean, 11:00etan, Txile kaleko Leticia Santamaria botikaren aurrean mobilizatu dira. Asteartean, berriz, Arana kaleko Monteagudo Arrazola establezimenduaren atarian elkartuko dira.
Novaltia farmazia banaketako kooperatiba bat da, eta, ELA sindikatuak azaldu duenez, hainbat botikako jabeak dira bazkideak. Horiek ordezkatzen dituen kontseilu errektorean hamabost farmazialari daude; horietako bost Euskal Herrikoak dira, tartean Gasteizko bi: Monteagudo Arrazola eta Leticia Santamaria.
Enpresako langileek 550 egun baino gehiago daramatzate greban, 2019ko uztailaren 22tik, hitzarmen propioa eskatzeko; eta azarotik ez da negoziazio bilerarik egin. Izan ere, langileen helburua lehengo hitzarmena berreskuratzea da —enpresa Vascofar zenekoa—; horrekin batera, "soldata eskala bikoitzak kentzea, azpikontratazioa mugatzea, lanaldia laburtzea eta soldata igoera bat lortzea".
"Grebalari askok 950 euro inguru irabazten dute hilean. Bitartean, enpresak 4,5 milioi euroko irabaziak eduki zituen, 2017 eta 2019 bitartean. Greba hau langileek pairatzen duten prekarietatearen aurkako borroka argia da", adierazi du ELA sindikatuak.