2019 eta 2020 bitartean film laburren bat ekoitzi duzu euskaraz? 20 minutu baino gutxiago irauten du? Areto desberdinetan proiektatzea gustatuko litzaizuke? Orduan, aukera paregabea duzu, 2021eko Laburbira deialdia martxan dago eta. Lanak aurkezteko epea otsailaren 4ra arte zabalik egongo da.
XVIII. edizioa izango da aurtengoa, helburu argi batekin: "Sortzaileen lanak ezagutaraztea, euskaraz ekoizten jarraitu dezaten aukera zabalduz", azaldu dute. Horretarako, apirilaren 26tik maiatzaren 30era bitartean, aukeratutako film laburrek herriz herri zeharkatuko dute Euskal Herriko zein kanpoko hainbat herri eta hiriburu. Zenbait kasutan, gainera, zuzendariek beraien lanak aurkezteko aukera izango dute publikoaren aurrean.
Iazko edizioa
2020ko XVII. edizioan ikus-entzuneko 27 lan jaso ziren arren, bederatzi film labur aukeratu ziren: Gau Beltza, Urak dakarrena (Marilyn), Anti (Josu Martinez), Tigre bat (Amaia San Sebastian), Pil Pil (Kristina Zorita), Mamarro (Ibon Iza), Kateak (Yolanda Mazkiaran), Jauzi bat eta Prixt (Maitane Eyheramonho) eta Harria Herria (Dimegaz Kultur Elkartea). Horietako batzuk 2019ko hainbat jaialditan aurkeztutakoak ziren, eta ikusleen artean arrakasta handia lortu zuten.