Mendialdea.info hedabideak etxez etxeko laguntza zerbitzuko langileen salaketa jaso du. Etxez etxeko laguntzako lanak kudeatzen dituen Zaintzen Clece enpresako –Aldi Baterako Enpresa Elkartea (ABEE)– langileek azaldu dutenez, udaz geroztik, «gehiegizko kilometrajea» berrikustera behartu ditu zuzendaritzak.
Etxez etxeko joan-etorri horiek Aldundiak deitutako lehiaketaren enpresa esleipendunak eskaintzen dituen zerbitzu-loteei lotuta daude: Mendialdean, Lautadan eta Arabako Errioxan. 2020 osoko kilometrajearen berrikuspenaren barruan, dieta horiengatik kobratutako zenbatekoak itzultzeko eskatu die enpresak. Itzulketak batzuk 100 eurokoak dira, baina badaude 2.000 euroraino iristen diren kasuak; «gehiegizko» kilometro bakoitza 0,29 euroko kostua du.
Modu horretan, «auzia epaitegietara ez eramateko akordio konpentsatzaile bat» behartu nahi du, LAB, ELA eta CCOO sindikatuek osatutako enpresa batzordeak salatu duenez. Dirua itzultzeko «presioa» herriz aldatu behar duten «langile gehienetara» zabaldu da, Nuria Lopez de Uralde LABeko ordezkari sindikalaren arabera.
Enpresa batzordeak agerraldi bat eskatu du Batzar Nagusietan. Bestalde, Mendialdea.info ataria Zaintzan Clece enpresaren azalpen zuzena lortzen saiatu da, baina, oraingoz, arduradunek ez dute eskaera onartu.
Google Mapsen ibilbideak
Sindikatuek azaldu dutenez, zerbitzua egiteko autoa erabiltzen duen langile bakoitzak bere etxeko helbidea markatu behar du hasieran, eta, ondoren, erabiltzailearena, helmuga gisa; lanaldi osoan zehar.
Arazoa da enpresak Google Maps aplikazioaren irizpideak kontuan hartzen dituela; hau da, aplikazioak «ahalik eta ibilbide laburrena» egiteko ezartzen dituen kilometroak, eta ez foru sareko errepide batean dauden benetako kilometroak. «Errepide batzuk landa-bideak dira, egoera txarrean daude, traktoreak edo artaldeak daude... Horrek ez die axola, ibilbide laburrena eta gehienez 10 minutukoa egitea baizik», adierazi du Lopez de Uraldek.
Mendialdea.info atariak argitaratutako informazioa ekarri dugu ALEAra, euskaraz; jatorrizko albistea hemen duzue ikusgai.