Covid-19aren aurkako txertoaren lehen dosiak iritsi dira Guadalajaratik EAEra, eta Gotzone Sagardui Osasun sailburua txerto horien harreran izan da Txagorritxun, Arabako Unibertsitate Ospitalean; Pfizer eta Biontech botika-enpresek garatutako txertoak dira.
Sailburuak adierazi duenez, txertoaren etorrera "itxarondako unea da, eta pandemiaren aurreko eta ondorengo" bat izango da. Osasun sailburuorde Iñaki Berraondo, Osakidetzako zuzendari nagusi Rosa Perez, Osasun Publikoaren eta Adikzioen zuzendari Itziar Larizgoitia eta Arabako ESIko ordezkariak egon dira Sagarduirekin.
140 dosi Araban
Igande honetan jasotako materiala 405 dosi dituen aurrerapen bat da, eta hiru lotetan banatu dira, txertaketa-kanpaina hiru lurralde historikoetako egoitzetan banatzeko: 140 dosi Araban, 85 dosi Bizkaian eta 180 Gipuzkoan.
Aurreikuspenen arabera, astero 16.000 dosi inguru iritsiko dira EAEra, txertoa eremu soziosanitarioko egoiliar zein profesionalei jartzeko. Erizaintzako eta erizaintza-laguntzaileko 16 profesionalek osatutako Osakidetzako taldea hiru egoitzetan izan da igande honetan, egoiliarrei eta zentroetako profesionalei lehen txertoak emateko.
Lehena, Ajuria foru egoitza
Arabaren kasuan, lehen txertoa Gasteizko Ajuria foru egoitzan jarri da. Consuelo Landa, 91 urteko egoiliarra, izan da txertoa jaso duen lehen arabarra, Paula Ortiz de Zarate Osakidetzako profesionalaren eskutik. Datozen egunetan jarraituko du txertaketa-kanpainak, hurrengo dosiak iritsi ahala.