Arabako Foru Aldundiak 34,7 milioiko inbertsioa aurreikusi du hurrengo urtean herrietan azpiegitura eta ekipamendu berriak egiteko edo daudenak berritzeko. Hala iragarri du Irma Basterra Lurralde Orekako diputatuak, eta Lan eta Zerbitzuen Foru Planaren xehetasunak jakinarazi ditu. Azpiegitura-obren eskaeren ehuneko handiena Lautadako, Gasteizko eta Mendialdeko kuadrillek eramango dute; Aiarak, ordea, inbertsio txikiena izango du.
Obra eta Zerbitzuen Foru Planaren bitartez hornidura eta saneamendua, argiteria publikoa, energia elektrikoko sareak edo zoladura, besteak beste, lagunduko dira, udalek eta kontzejuek egin dituzten eskaerei erantzunez. Hala, 50 urte baino gehiago dituen Espejo herriko hornidura eta saneamendu-instalazioak berrituko dira, argiteria eta elektrifikazioa lurperatuko dira eta zerbitzu berriak (telefonia eta telekomunikazioak) emateko lurpeko azpiegitura hornituko da. Laudion, berriz, oinarrizko gizarte-zerbitzuak emateko dauden azpiegiturak birdimentsionatzeko eta egungo beharretara egokitzeko jarduketa finantzatuko dute. Bestalde, Urizaharreko udaletxearen egungo eraikina egokituko da, Araiako sarbideak eraberritu eta modernizatuko dira, Donemiliagako kirol-espazioa birmoldatuko da eta Gobeon saneamendu-sareak eguneratu nahi dira euri-urak ur beltzen saretik bereizita biltzeko.