NAIZ hedabide digitalak argitaratu duenez, Oier Urrutia preso gasteiztarrak ez du Zaballako espetxera itzuli beharko, baldintzapeko askatasuna eman dion auto judiziala irmoa delako. Horretarako baldintzak betetzen dituela onartzen du azaroaren 26ko autoak; bertan jasotzen denez, Urrutiak zigorraren azken betetze-maila lortzeko behar diren gutxieneko baldintza objektibo eta subjektiboak betetzen ditu, eta, beraz, baldintzapeko askatasuna eman diote.
Urrutia 2009. urtean atxilotu zuten, eta 11 urte eta erdi eman ditu preso, SEGI gazte erakundeko kide izatea eta "kale borroka" delituak egotzita. Atxiloketaren unean, Urrutia Arana auzoko taberna baten arduraduna zen, eta auziak "muntai polizial bat" izatearen susmoa sortu zuen bere garaian; izan ere, akusazioaren oinarria lokalean aurkitutako petardo eta produktu errekor batzuk izan ziren, bestelako froga gehigarririk gabe.
Gaur egun Zaballako espetxean zegoen, hirugarren graduan, baina A Lama (Pontevedra), Navalcarnero (Madril), Daroca (Zaragoza) eta Logroñoko espetxeetan ere izan da preso. 14 urteko kartzela zigorra ezarri ziotenez, askatasuna 2023rako aurreikusita zegoen, baina presoak espetxe-legeriaren bidez egindako bideari esker, lehenago dago kalean.
Zaballako azken fasean, etxeko espetxealdia izan du Oier Urrutiak, osasun krisia eta hainbat erakunderen presioa direla eta, baldintzapeko askatasunaren espedientea ebatzi bitartean. Zigorraren hiru laurdenak beteta zituen 2019ko irailetik, baina hirugarren gradua ez diote 2020ko uztailera arte eman.
Jon Etxeberria, El Duesoko espetxera
Gainera, Espetxe Erakundeek ostiral honetan iragarri dute sei euskal preso gehiago Euskal Herriko edo gertuko espetxetara hurbilduko dituztela. Horien artean Jon Etxeberria preso gasteiztarra dago: Castelloko espetxetik El Duesora (Kantabria) hurbilduko dute, etxetik 170 kilometrora.