Ryanair izan da Forondatik bidaiarien hegaldietarako lehiaketara aurkeztu den konpainia bakarra, eta, beraz, badirudi 2025eko martxora arte jarraituko duela lanean Gasteizen, egungo konexioekin eta Belgikarekin beste bat eskainiz.
Eusko Jaurlaritzak, Aldundiak, Udalak eta Merkataritza Ganberak osatzen duten aireportua sustatzeko sozietateak (VIA) aste honetan jakin du 2021eko martxotik 2025eko martxora bitartean hegaldi erregularrak sustatzeko lehiaketarako konpainia bakarra aurkeztu dela; 4,8 milioi euroko aurrekontua izango du, eta beste milioi bat gehiago izan daiteke.
Ryanair bakarrik aurkeztu da, eta gaur egun eskaintzen dituen hegaldiei –Malaga, Sevilla, Palma, Milan eta Kolonia– beste lotura berri bat gehituz: Bruselarekin lotura berri bat iragarri du Charleroiko aireportuaren bitartez.
Arabako Merkataritza Ganberako iturriek azaldu dutenez, lehiaketaren esleipena oraindik ez da ofiziala, oraindik oniritzia jaso behar duelako txosten batean eskaintza aztertu ostean, baina badirudi Ryanairrek beste lau urtez jarraituko duela lanean Gasteizen.