Kutsatze altua duten egoitza pribatuen kontrola hartzeko eskatu dio EH Bilduk Aldundiari

Claudia Venceslao, EH Bilduko batzarkidea Arabako Batzar Nagusietan. / EH BILDU

EH Bilduk kutsatze kopuru altua duten Arabako egoitza zein etxebizitza komunitario pribatuen kontrola hartzeko eskatu dio Foru Aldundiari. Aldundiak "protokoloak kontrolatu" behar dituela ohartarazi du Claudia Venceslao batzarkideak.

Astelehen honetan, EH Bilduk mozio bat erregistratu du Batzar Nagusietan, eta kudeaketa pribatuko egoitzak zein etxebizitza komunitarioak kontrolatzeko eskatu dio Aldundiari, Covid-19ko kutsaduraren prebalentzia handia duten kasuetan. Claudia Venceslao EH Bilduko batzarkideak argudiatu duenez, Aldundiak "protokoloak eta eguneratze planak kontrolatu behar ditu, birusaren sarrera ahalik eta gehien murrizteko".

Bigarren olatuan, berriro ere, foku garrantzitsuak ematen ari dira egoitza eta etxebizitza komunitario pribatuetan, baina Aldundiak ez du esku hartu oraingoz. EH Bilduk salatu duenez, "EAE da egoitza zentroetan esku hartu ez duen autonomia erkidego bakarrenetakoa, nahiz eta zentro horien barruan egoera oso larriak izan".

Venceslaoren ustez, lehen olatuan gertatutakoa errepikatzen ari da: "Lehen olatuan ez zen esku hartzerik izan, egoitzak ia babesik gabe utzita; bigarren olatuan ere ez dago zentro horietan esku hartzeko asmorik".

Gainera, EH Bilduk ohartarazi du langile gehienak kutsatu direla eta ikuskaritzek ez dutela "behar bezala funtzionatzen". Batzar Nagusietan salatu dutenez, ikuskapenek "aurrez programatuak eta urriak" izaten jarraitzen dute. "Aldundiak ez du egoitzetan gertatzen ari dena kontrolatzen, bere egungo ikuskapen ereduak ez zuelako pandemiaren aurretik balio, eta, jakina, gaur egun ere ez duelako balio", kritikatu dute.

Azkenik, Venceslaok adierazi du mozio hori martxan jartzeari uko egiteak, "azalezina izateaz gain", horrelako zentroetan bizi diren "adinekoen osasuna arriskuan jartzea" ekarriko lukeela.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide