Eusko Jaurlaritzak antolatutako XVI. Dantza Zirkuituak bi ikuskizun ekarriko ditu aste honetan Gasteizko antzokietara. Asteazkenean izango da lehen hitzordua, hilaren 4an, La Intrusa Danza konpainiak eskainiko duen It's a wrap (Kubrik is dead) koreografiarekin; Principal antzokian, 20:30ean. Bigarrena ostiralean, hilaren 6an, helduko da; Danza Mobilek eta Incubo Teatrok El festín de los cuerpos lana aurkeztuko dute Felix Petite antzokian.
Arte-sorkuntza garaikideko konpainia da La Intrusa danza, Virginia Garciak eta Damian Muñozek 1996an sortutakoa. Proiektu eszenikoak eta ikus-entzunezkoak sortu, zuzendu eta ekoizten dituzte, eta hainbat diziplinatako estatuko zein nazioarteko artistekin lankidetzan aritzen dira. 2015eko Dantza Sari Nazionala lortu zuten, sorkuntzaren modalitatean.
Danza Mobile, berriz, 2001. urtean sortu zen, eta erreferentzia da dantza garaikide inklusiboan, estatuan eta nazioartean. Lehen emanaldia egin zuenetik, 25 ikuskizun ekoiztu ditu. Oraingoan, INcubo Teatro-rekin izango da elkarlanean; Arturo Parrillak sortutako konpainia da, dantza garaikideari lotutako mugimenduaren eta keinuaren esperientziatik sortua, baina aktorearen bizipenean oinarrituta.