Bi diskotan banatu du Kaos#Kosmos hirugarren lana Antton Aranburuk; Zabal Dadila Kaosa! eta Sor Bedi Kosmosa!, hogei kantu eta abesti bakoitzaren osagarri gisa idatzi dituen hogei ipuinekin batera. Haren barnean sentitzen dituen "kaosa" eta "kosmosa" eraman ditu kanta berrietara, barne ezinegona agerian.
"Bestalde, lasaitasunean, gauza txikietan topatzen ditudan erantzunak ere aurki daitezke letretan, nire kantetan ohikoak diren paisaia eta argazki desberdinekin". Maite Kareagak lagunduta, diskoa aurkeztuko du Aranburuk datorren asteazkenean, urriaren 21ean, Gasteizko Arana gizarte etxean; 19:00etan. Kaosetik kosmosera bidaia, literatura eta musikaren eskutik.