Arabako Diputazioak azalpen panelak jarri ditu Uribarri Ganboako urtegiaren inguruetan, urtegia eraiki eta gero osorik edo zati batean ur azpian desagertu ziren herriak gogorarazteko, eta haiek zeuden lekuak adierazteko. Hain justu ere, honako guneetan jarri dira: Garaioko informazio gunean; Landako aparkalekuan; Mendixurko parke ornitologikoko aparkalekuan; Uribarri Ganboan, urtegiko ibilbide berdearen alboan; Zuhatzako uharteko ontziralekuan eta presako begiratokian.
Proiektuan elkarlanean aritu dira tartean diren udalak, eta baita herritar talde bat: datu eta argazki historikoak biltzeaz arduratu dira eta gertatutakoaren oinarria diseinatu eta idatzi dute.
Paneletan, urtegiari, haren eraikuntzari eta eragindako herriei buruzko informazio orokorra jaso da, honela banatuta: Uribarri Ganboa eta Langara Ganboa, Uribarri Ganboakoan; Landa, Marieta eta Larrintzar, Landakoan; Garaio eta Orenin, Garaiokoan; Mendixur, Azua eta Urizar, Mendixurko parke ornitologikokoan; eta Zuhatzu Ganboa, Mendizabal eta Landa, Zuhatzako ontziralekukoan.
Kartelek QR kodea ere badakarte; horren bidez informazio osatuagoa eskuratu daiteke Aldundiaren webgunera sartuta.