Arabako Foru Aldundia foru baliabide soziosanitarioetarako bisitak arautzeko Foru Agindua berehala amaitzea espero du, Eusko Jaurlaritzako Osasun Sailak zentro soziosanitarioak zaintzeko eta Covid-19a kontrolatzeko osatutako protokoloan oinarrituta. Horrela, konfinamendua amaituko da egoitzetan, baina neurriak nahiko murriztaileak izango dira oraindik ere.
Agindu berriari esker, egoitzetako erabiltzaileek bisita gehiago jasotzeko eta kanpora irteteko aukera izango dute; betiere, zentroaren beraren eta udalerriaren egoera epidemiologikoaren arabera. Hiru foru aldundiek dute arlo horretako eskumena, eta protokolo berriaren garapena koordinatzea haien ardura izango da.
Bisita gehiago
Datozen egunetan argitaratuko da Foru Agindua, eta bertan jasoko dira bisitak eta irteerak egiteko baldintza zehatzak. Momentuz, Aldundiak aurreratu du bisitak Arabako zentro guztietan egin ahal izango direla, kasu positiborik ez badago. Bisita bakoitzak pertsona batera mugatuta jarraituko du, baina bisita guztietan ez da pertsona bera izan beharko. Ordubeteko iraupena izango dute, eta gutxienez bi bisita egin ahal izango dira astean.
Neurri horiek, pandemiaren hasieratik bezala, ez dira aplikatzen bizitzaren amaierako prozesuan dauden pertsonen eta narriadura kognitiboa duten pertsonen kasuan; horietan, aldi berean, kontaktu fisikoa baimenduko da, betiere segurtasuna areagotuz.
Bisiten sistema eta segurtasuna hobetu ahal izateko, Aldundiak bisita-planak egiteko eskatu die lurraldeko egoitza-zentro guztiei, eta foru ikuskaritzako taldea plan horiek berrikusten ari da.
Irteerak
Bestalde, egoitzetako erabiltzaileen irteerei dagokienez, "zuhurtasunetik eta erantzukizun partekatutik" abiatu da Aldundia. Egoera epidemiologikoak ahalbidetzen duen zentro guztietan irteerak egin ahal izango dira, kasu guztietan espazio itxiak eta jendetsuak saihestuz, eta ibilaldi terapeutikoak lehenetsiz.
Gehienez astean bitan izango dute ateratzeko aukera, betiere egoitza-zentroaren inguruan, ordubeteko iraupenarekin eta egoiliar bakoitzeko gehienez bi pertsonaren laguntzarekin.
Koronabirusa Arabako egoitzetan
Azken hilabetean, positiboak atzeman dira Arabako zenbait egoitzatan: Elorrin, Salburuko Tagoren, Zuiako Orobiden eta Coliseé Miñaon izan dira agerraldirik handienak, baina Ariznabarran, Txagorritxun, Albertia Centro egoitzan eta Jesus Guridin ere kasuak izan dira, besteak beste.
Pandemiaren bigarren uholdearekin lotutako epe horretan, gutxienez sei pertsona hil dira, baina beste 44 osatu dira.