Tropa frankistek Arabako Foru Aldundiko kudeaketa batzordeko lehendakaria zen Teodoro Olarte fusilatu zuten egun berean, irailaren 18an –1936. urtean–, omenaldia antolatu ohi dute Foru Aldundiak eta Batzar Nagusiek. Diktadura frankistak Araban errepresaliatutako pertsona guztien omenez, aurten ere omenaldia izango da, baina berezia osasun egoeragatik.
Pandemiaren ondorioz hartu behar diren segurtasun neurriak direla eta, bertan behera geratuko da ohiko ekitaldi instituzionala, erakundeetako ordezkariek parte hartzen duten ekitaldia, ezin baita beharrezko distantzia soziala mantendu omenaldiaren espazioan. Horren ordez, Ramiro Gonzalez ahaldun nagusiak eta Pedro Elosegi batzarretako lehendakariak herritar guztiak animatu dituzte beren omenaldia egiteko egun guztian zehar, eta nahi dutenek errepresaliatutako pertsonen omenez lore bat uzteko In Memoriam monolitoan, Argi basoa izeneko eskultura multzoan, Probintzia plazaren atzeko aldean.