Arabako Diputazioaren Eskola Kirolaren 2020-2021 Programak aldaketa nabarmenak izango ditu aurreko denboraldiekin alderatuta; gainera, beranduago hasiko da. Izan ere, Foru Aldundiak ikastetxeetara itzulera nola doan ikusi nahi du kirol jarduerarekin hasi baino lehen.
Foru Aldundiko Kultura eta Kirol Sailak Covid-19aren aurrean jarduteko arau orokorrak helarazi dizkie herrialdeko udalei eta kirol erakundeei. Arau horiek Eskola Kirolaren Euskal Batzordean adostu dituzte hiru foru aldundiek eta Eusko Jaurlaritzak 2020-2021 denboraldirako, eta nahitaez bete beharko dira hiru lurraldeetako eskola programetan.
Erakundeek protokolo bat bete beharko dute, arauak onartzeko akordioak aurkeztu beharko dituzte, osasun arduradun bat izan beharko dute, eta teknikariek prebentzio eta segurtasun ikastaro bat egin beharko dute.