Naturak eta argazkigintzak bat eginik, Euskal Herriko paisaia ederrenetako batzuez gozatzeko aukera dago egunotan Gasteizko Ataria naturaren interpretazio gunean. Click natura-argazkilari taldeak antolatuta, hamabi argazkilariren berrogeita hamar lan paratu dituzte erakusketan, ingurune natural berezietako paisaia, animalia edota landareen irudiekin.
"Erakusketako argazkiek ingurune naturalean argia harrapatzeko artea deskubritzen dute; ikuslea liluratzeko gai dira, inguratzen gaituen paisaian, faunan edo floran harrapatutako une paregabeak transmititzen baititu", nabarmendu dute antolatzaileek. Irailaren 6ra arte izango da ikusgai erakusketa.