Liga berriz abian jarri zenetik Alavesek zaplastekoak besterik ez ditu jaso. Jokaturiko zazpi partidatik bakarra irabazi du, Realaren aurka Mendizorrotzean. Gainontzeko guztietan galtzeaz gain itxura kaxkarra eman du.
Hori guztia kontuan izanik, Alaveseko zuzendaritzak Asier Garitano entrenatzaile kargutik kentzea erabaki du. Nolabait esateko, futbolean ez idatzitako legea da hori. Duela egun gutxi, Joxean Kerejetak jokalariak jopuntuan jarri zituen, baina azkenean entrenatzailea kaleratu du.
Geldiunea baino lehen taldea sasoi betean zegoen
Asier Garitanok egindako lana apaltasun eta xumetasunean oinarritu da. Hasieratik oztopoak besterik ez ditu izan; izan ere, lehen jardunaldietan kolokan izan zen. Gerora, gorabehera askorekin taldea bideratzen lortu zuen, eta geldiunea baino lehen taldea sasoi betean zegoen. Horri esker, taldea zutabe sendoa jarri zuen mailari eusteko. Eskerrak lan horri, bestela, azken emaitzak ikusita, taldea kinka larrian izango litzateke.
Egia esanda, azken neurketetan, Asier Garitanok aldaketak besterik ez ditu egin, baina ez du inongo fruiturik lortu. Taldea noraezean aritu da, nortasunik gabe; gainera, okerrena emandako itxura izan da. Dena den, jokalariek ere ez dute neurria eman, eta asko kostatu zaie behar bezala lehian sartzea. Horren adibidea dugu jasotako txartel gorriak, hiru partidetan jarraian.
Halere, katearen katebegirik ahulena entrenatzailea da. Orain, taldea berpizteko Juan Ramon Lopez Muñiz ekarri dute. Agur apal eta xumea Asierri eta ongi etorri beroa Juan Ramoni.