Covid-19 agerraldi berri bat ikertzen ari dira Txagorritxu ospitalean, Eusko Jaurlaritzako Osasun Sailak jakinarazi duenez. Lau positibo baieztatu dituzte: Onkologiako bi paziente, osasun-langile bat eta bigarren pazientea bisitatzera joaten zen senide bat. Hogeita hiru langile jarri dituzte berrogeialdian.
Pazienteetako bati bi PCR proba egin zizkioten ospitaleratzean, eta negatibo eman zuen. Ebakuntza egin ostean, ordea, positiboa dela jakin dute, eta, beraz, protokoloa aktibatu dute; isolatu eta 75 pertsona baino gehiagori egin zaizkie PCR probak, osasun-langileen eta unitateko beste paziente batzuen artean. Proba horretan positibo eman dute solairu bereko osasun-langile batek, unitate bereko beste paziente batek eta azken hau bisitatzera joaten zen senide bat.
Sukarra duten paziente guztiei egin zaie proba, eta orain arte inork ez du positibo eman. Gainera, paziente positiboak egon diren gelak desinfektatu dituzte.