Etorkizun politikoa erreferendum bidez erabakitzeko eskubidea defenditzen duen Hamaika Gara ekimenak Arabako plazak aldarriz betetzera deitu ditu herritarrak igande honetan. Gasteizko Foruen plazan, Murgiako udaletxe plazan, eta Laudio eta Aramaioko herriko plazetan deitu dituzte hitzorduak.
"Covid 19 azaldu baino lehen gure autogobernuaren inguruan sumatzen ziren eta pandemiaren kudeaketak areagotu dituen gabeziez ohartuta, Hamaika Gara ekimenak herritarrak animatu nahi ditu ekintza apal bezain sinboliko batean parte hartzera", azaldu dute sustatzaileek. Elkarretaratze "berritzaile eta desberdina" izango dela esan dute, agintariek aholkatzen dituzten osasun- baldintza guztiak kontuan hartuta. Elkarretaratze horretan herritar bakoitzak etxetik eramango du bere aldarri propioa kartoi xume batean idatzita. "Lelo horiek zerikusirik izango dute gure etorkizuna libreki erabakitzeko dugun eskubidearekin". Aldarri horiekin guztiekin gero mosaiko koloretsu bat osatuko dute, eta horrek jarriko dio amaiera ekintza sinboliko eta aldarrikatzaileari.
Hamaika Gara ekimena martxoaren 11n abiatu zen. Gure Esku erabakitzeko eskubidearen aldeko dinamikak abiatu zuen, eta 24 eragile dira orain sustatzaileak. Egitasmoa aurkeztu eta egun gutxira, osasun krisiak baldintzatu zuen: erreferenduma eskatzeko abian zen sinadura bilketa eten egin zuten, eta kalean egitekoak ziren mobilizazioak udazkenera atzeratzea erabaki zuten sustatzaileek.
Igande honetako ekintzak Euskal Herri osoan antolatu dituzte, 11:00etan. Arabari dagokionez, Gasteizen (Foru plaza), Aramaion (herriko plaza), Laudion (herriko plaza) eta Murgian (udaletxe plaza) izango dira elkarretaratzeak.