Eusko Jaurlaritzak jakinarazi duenez, abeltzain bat hil da Urizaharrean, traktorearekin istripua izan ostean. Istripua 14:15 aldera gertatu da, A-3202 errepidetik gertu dagoen lursail batean, Urizaharra eta Bastida artean.
Ibilgailua altxatu egin da, eta traktorearen eta atoiaren artean harrapatuta geratu da 66 urteko gizona. Arabako suhiltzaileak bertaratu dira, baina ezin izan dute ezer egin; bertan hil da.
2020: 34 hildako lanean
Urizaharreko heriotzaren aurrean, abeltzaintzako lan baldintzak hobetzeko neurriak eskatu dizkie LAB sindikatuak administrazioei, baita laneko arriskuen aurreko prestakuntza plana martxan jartzea ere.
"Sektoreko jarduerak arrisku anitz ditu. Langileek lan desberdin asko egiten dituzte, askotan bakarrik, zenbaitetan lan gogorrak eta neketsuak", ohartarazi dute: "Orografia berezian lan egiten dute, zarata pairatzen dute, estres termikoa, simaurra manipulatzen dute, ongarri kimikoak erabiltzen dituzte, makinaria ugari erabiltzen dute. Horrek, sektoreko ezbehar tasa altuari eragiten dio; gainera, lan arriskuen alorrean prestakuntza gutxi jasotzen dute".
Hildakoaren senitarteko eta gertukoei "babes eta elkartasunik zintzoena" adierazteaz gain, sindikatu abertzaleak gogorarazi du aurten gutxienez 34 langile lanean hil direla Euskal Herrian, eta Zaldibarreko bi langileak desagertuak jarritzen dutela duela 117 egunetik. Eta azken istripua salatzeko mobilizazioetan parte hartzeko deia egin diete herritarrei.