Langilearen Eguna

"Bizitza erdigunera" ekartzeko egitaraua antolatu du LABek Maiatzaren Lehenean

Bizitza erdigunera, gure lanak mundua eraldatzen du lelopean, mobilizazio ibiltariak, streaming bidezko emisioa, ekitaldi nagusia eta etxeetako elkartasun keinuak antolatu ditu LAB sindikatuak ezohiko Langilearen Egunerako.

Sindikatu abertzaleak auto karabanak egingo ditu eskualdeka, 10:00etan; Arabaren kasuan, mobilizazio ibiltariak deitu dituzte Gasteizen, Laudion eta Amurrion. Goiza 12:30ean borobilduko dute, sindikatuaren ekitaldi nagusiarekin; bertan hitza hartuko du Garbiñe Aranburu idazkari nagusiak, besteak beste.

Mobilizazioen ostean, 11:30etik aurrera, streaming bidezko proiekzioak eta solasaldiak egongo dira arratsaldera arte, LAB sindikatuaren YouTube kanalaren bitartez; besteak beste, ekitaldi nagusia ikusteko aukera emango dute bertan.

Horrez gain, balkoi eta leihoetan elkartasun ekimenak egingo dituzte egun osoan zehar; izan ere, euskal gehiengo sindikalak ikur bateratua adostu du leiho eta balkoietan jartzeko.

Hona hemen LAB sindikatuaren egitarau osoa:

  • 10:00 | Mobilizazio ibiltariak eskualdez eskualde.
  • 11:30 | Streaming bidezko emanaldiaren hasiera.
  • 11:35 | Hokoke dokumentala.
  • 12:30 | Ekitaldi nagusia
  • 16:30 | Hotel Explotacion dokumentala.
  • 17:30 | Zaintzaren inguruko SOLASALDIA: Maria Sarasola (helduen egoitzetako erizaina), Josefina Roco Sanfilippo (politilogoa, Unibertsitateko irakaslea, ekonomia feministan aditua eta Trabajadoras No Domesticadas erakundeko militantea) eta Eli Etxeberria (LABeko idazkari feminista). / Moderatzailea: Aiora Imaz, LABeko Barne Komunikazioko arduraduna.
  • 18:20 | Shockaren doktrina dokumentala.
  • 19:45 | Mundua eraldatu duten langileei txaloak.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide