Lan Osasunaren Nazioarteko eguna

Langileen bizitza "lehentasuna" izan behar dela aldarrikatu dute lantokietan

Euskal gehiengo sindikalak indarrak batu ditu aurtengo Lan Osasunaren Nazioarteko Egunari begira. Apirilaren 28a da salaketa eguna, baina Araban bezperatik hasi ziren lantokiz lantokiko mobilizazioak, San Prudentzioko jai eguna dela eta.

ELA, LAB, ESK, Steilas, Hiru eta Etxalde sindikatuek Zalbibarren egin dute ekitaldi nagusia, bi langile oraindik lurperatuta dauden zabortegiaren aurrean.

Osasun krisiaren testuinguruan, langileen bizitzak "lehentasuna" izan behar duela aldarrikatu dute: "Ezin da arriskuan jarri enpresen eta Gobernuen nahieran", adierazi dute bertan.

Hego Euskal Herriko txoko ezberdinetan mobilizazioak egin dira, lantokiz lantoki; leku bakoitzaren baldintzen arabera, elkarretaratzeak, bideoak eta argazkiak egin eta bildu dituzte sindikatuek.

Egun osoan zehar, irudiak argitaratuko dituzte, laneko segurtasunari eta osasunari buruzko aldarrikapenekin; #BizitzaDefendatu traola erabiltzen ari dira.

Arabaren kasuan, mobilizazioak egin dira astelehenetik, Gasteizen, Aiaraldean eta Gorbeialdeko lantoki zein industria gunetan.

ALEAk erabili dituen irudiak ELA, LAB eta ESK sindikatuenak dira.

 


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide