Sinopsia: Gure herria zur mutua da. Lur egurtua. Gure lurra egurra da. Zizelkatzeke dagoen zura. Amikuze, Sestao, Tutera, Aldude, Moreta, Irunberri. Sei herri bizi eta militatzeko, sei gazte esperientzia horiei ahotsa jartzeko.
Nor bere ertzetik hasi da zizelkatzen, baina bidegurutzean elkartu gara sarri. Lur bat herri bihurtzeko saiakeran ari diren sei gazteren errealitateak eta ametsak biltzen ditu dokumental honek. Euskal Herriak paisaia bat eta bakarra ez duen eran, herrigintzan ere borroka eta bizipen desberdinak biltzen ditu bere geografiaren azalean. Begirada deszentratua, zizel-hotsak entzuten dira bere luze zabalean. Bizitzeko, militatzeko, harremantzeko, eta finean, Euskal Herria irudikatzeko beste modu bat dakarten zizel-hotsak.