Telelanean euskaraz aritzeko aholkuak

Telelanaren garai honetan ere garrantzitsua da langile eta bezeroekin euskaraz egiteko ohiturarekin jarraitzea edo ohitura hartzeko pausoak ematen hastea. Ea aholku hauek baliagarri zaizkizuen.

Zertarako euskaraz? Hemen bildu ditugu arrazoi batzuk:

• Markaren posizionamendua hobetzeko.
• Bezeroarekiko gertutasuna eta konfiantza sortzeko eta sendotzeko.
• Bezero kopurua handitzeko eta fidelizazioa indartzeko.
• Merkatu berrietan sartzeko eta etekinak areagotzeko.
• Talde kohesioa eta motibazioa bizkortzeko.
• Produktu /zerbitzu lehiakorrak eta kalitatekoak izateko eta eskaintzeko.
• Euskaraz bizi eta euskaraz erosi edo euskaraz lan egin nahi duten pertsonei aukera errazteko.
• Lurraldearen eta pertsonen ongizatea eta garapena hizkuntzekin / euskararekin ere lotzeko.

Aholkuak

Internetez lan egin behar dugun garai honetan lagungarri izango zaizkizuen zenbait aholku prestatu ditugu, Bai Euskarari Elkartearen Praktika egoki eta eredugarria euskaraz proposamenean oinarrituta.

Lanerako baliabideak

• Euskaraz lan egiteko irizpideak eta baliabideak adostea, ezartzea eta komunikatzea; eta horien segimendua egitea.

• Lanerako baliabideek (softwareak, dokumentazioak…) euskaraz lan egiteko aukera bermatzea.

Irudi korporatiboa

• Webgunearen atal finko eta eduki guztiak euskaraz egotea.

• Produktu eta zerbitzuen informazioa, katalogoak, etab. euskaraz eskaintzea.

• Webgunean bi hizkuntza edo gehiago erabiltzen direnean, euskarari lehentasunezko tratamendua ematea. 

Kanpo harremanak

• Lehenengo hitzetik euskaraz.

• Kasu guztietan, ahoz zein idatziz, bezeroa edo erabiltzailea euskaraz artatua izatea. Kontsumitzaileei eta erabiltzaileei zuzendutako elementuak euskaraz egotea.

• Produktuen eta zerbitzuen gida liburuak, azalpenak eta bermeak euskaraz eskaintzea.

• Bi hizkuntza edo gehiago erabiltzen direnean, euskarari lehentasunezko tratamendu formala ematea. 

• Prentsa idatziko, irratiko eta telebistako iragarkiak euskaraz zabaltzea.