Koronabirusa

Ez da hauteskunderik egongo apirilaren 5ean

Erredakzioa 2020ko mar. 16a, 12:47
Bertan behera geratu dira apirilaren 5eko hauteskundeak. / ALEA

Koronabirusak eragindako krisia dela eta, apirilaren 5ean deituta zeuden Eusko Legebiltzarrerako hauteskundeak bertan behera geratu dira. Iñigo Urkullu lehendakariak alderdi politikoekin egindako bileran jakinarazi du erabakia.

Astelehen goizean, aurreikusi bezala, EAJ, EH Bildu, Elkarrekin Podemos, PP, PSE eta Equo alderdietako ordezkariak bildu dira Iñigo Urkullu lehendakariarekin. Botoa emateko baldintzarik ez dagoela adostuta, hauteskundeak atzeratzea erabaki dute.

Hala onartuko du asteartean Eusko Jaurlaritzako Gobernu Kontseiluak. Hitzordu berria osasun larrialdi egoera eta alarma egoera amaitzen direnean egitea adostu dute; krisialdia gainditzen denean, posible den lehenengo igandean egingo dira.

Eusko Legebiltzarra itxita

Eusko Legebiltzarraren jarduera asteleheneko 14:00etatik aurrera etengo da; eraikinak zein instalazioak itxi eta bertan behera utziko ditu eskaintzen dituen zerbitzu guztiak. Premiazko neurriak hartu dituzte Eusko Jaurlaritzak aldarrikatutako osasun larrialdi egoeraren eta Espainiako Gobernuak ezarritako alarma egoeraren testuinguruan.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide