Baskoniak ezin izango du Kirolbet apostu etxearen izena erabili

Baskoniako jokalariak aurtengo denboraldian erabiltzen duten elastikoa jantzita. / @baskonia

Taldearen izen ofizialetik kendu arren, elastikoetan marka bera erabiltzen jarraitu ahalko dute gasteiztarrek.

Madrilgo Kontsumo Ministerioak kirol-apustuen neurriz kanpoko publizitatea saihesteko neurriak hartuko dituela adierazi berri du eta lege berriak egungo iragarkien "%80 inguru debekatzea" eragingo duela iragarri du. Alberto Garzon ministroaren hitzetan "neurri drastikoa da, baina beharrezkoa: lehen urrats urgentea, ausazko jokoek eta apustuek eragin ditzaketen osasun publikoko arazoei heltzeko". Erregulazio hori datozen asteetan hasiko da tramitatzen Diputatuen Kongresuan.

Neurrietako bat talde baten izena zuzenean apustu-etxe batekin lotzea debekatzea izango da; gaur egun Kirolbet Baskoniak egiten duenaren antzera. Beste horrenbeste gertatuko da kirol azpiegituren izendapenekin ere. Edozelan ere, Kirolbeten marka elastikoan janzten jarraitu ahal izango du Baskoniak.

Lege aldaketa horiek datozen hilabeteetan tramitatuko dituzten arren, zaila izango da denboraldi honetan zehar indarrean jarri ahal izatea.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide