Segurtasun Sailak jakitera eman duenez, Ertzaintzak auto baten gidaria atxilotu du Altuben, AP-68 autobideko ordainlekutik gertu, Zigoitian bi txirrindulari harrapatu eta ihes egin ondoren. Kotxe gidariak harrapatutako txirrindularietako bat Mikel Landa zela jakin ahal izan da handik gutxira.
Murgiarrak berak Twitter bidez jakinarazi duenez, lagun batekin entrenatzen ari zela, kotxe batek atzetik kolpatu ditu eta ihesari eman dio. Horrekin batera, mezu lasaigarria ere zabaldu nahi izan du; azterketa medikua egin ostean ez da zauri larririk antzeman eta laster entrenamenduetara bueltatzeko gogoz dagoela jakinarazi du.