Arabako ordezkaririk ez da faltako aurten Espainiako Zinema Akademiak ematen dituen Goya sarietan. Larunbatean, hilaren 25ean, Malagan banatuko dituzte sariok, eta hantxe izango dira Karra Elejalde eta Ainhoa Santamaria aktore arabarrak.
Bi sortzaileak Alejandro Amenabarren Mientras dure la guerra pelikulagatik izendatu dituzte. Karra Elejalde aktore gasteiztarrak hirugarren Goya jaso dezake larunbatean Miguel de Unamunoren paperagatik; aurretik También la lluvia (2010) eta Ocho apellidos vascos (2014) pelikuletako lanagatik jaso ditu. Antonio Banderas, Antonio de la Torre eta Luis Tosar izango ditu oraingoan lehiakide.
Ainhoa Santamariak, berriz, lehendabiziko izendapena du hauxe; errebelazio aktore onenaren saria jaso dezake Amenabarren pelikulan egindako Enriqueta Carbonellen paperagatik. Pilar Gomez, Benedicta Sanchez eta Carmen Arrufat ere izango dira lehian.