Azkena Rock jaialdia, ekainaren 19an eta 20an Mendizabalako zelaietan ospatuko dena, ari da egitaraua osatzen. Patti Smith & Band, Social Distortion, Fu Manchu, L7, Reverend Horton Heat, The Steepwater Band eta The Faithless iragarri ostean, atzo beste hainbat talde aurkeztu zituen jaialdiak; horien artean, John Fogerty eta Brian Wilson nabarmendu behar dira.
Fogertyk Creedence Clearwater Revival gidatu zuen zazpi urtez, beste hamaika lanen artean, eta bigarrenez arituko da Gasteizen. Wilson, berriz, The Beach Boysen sortzailea izan zen, eta berea da Pet Sounds XX. mendeko disko entzutetsuenetakoa.
Horiekin batera, Suzy Quatro, Brian Wilson, Incubus, Drive by Truckers, The Adicts, Baroness, Shooter Jennings, Robyn Hitchcock, The Wildhearts, Derby Motoreta's Burrito Kachimba, Tahures Zurdos, Petroleo, Ray Collin's Hot Club, DeWolff eta Wicked Wizzard taldeak ere arituko dira.