Sorginenea Emakumearen Etxea eta Lumagorriren LGTBI+fobiaren aurkako Behatokia hedabideen aurrean azaldu dira gaur, Gasteizko Udal gobernuak aurkeztu dituen aurrekontuak bi proiektu horiek "bideraezin" egiten dituela salatzeko.
Bi kasuetan hitzarmena aurten sinatu dute, egitasmoa abian jartzeko helburuarekin eta sei bat hilabeterako; Sorginenearen aurrekontua 90.000 euro eta Behatokiarena 30.000 euro. "Gorka Urtaran alkateak eta Maider Etxebarria alkateordeak aurkeztutako aurrekontu-proiektuan, 2019ko aurrekontu biak bere horretan uzten dituzte. Hau da, sei hilabeterako aurrekontuak zirenak 12 hilabeterako izango dira", salatu dute goizean eman duten prentsaurrekoan.
Biak "hiri proiektu estrategikoak" direla gogoratu dute, prozesu luzeen ondorioz sortuak eta mugimendu feminista eta LGTBI+ren aldarrien emaitza. Eta nabarmendu dute Gasteizko Udalak aho batez onartu zuela bi proiektuak sendotzeko eta bermatzeko "baliabide nahikoak" jarriko zituela.
"Baina errealitatea bestelakoa da, eta aurreko legealdiaren amaieran martxan jarri zena hiltzen uzten dute legaldi honetan", kritika egin dute prentsaurrekoan. "Argazkia atera eta proiektua saldu ondoren, EAJ-PSEk osatutako udal gobernuak proiektua finkatzea eragozten du eta bideragarritasuna oztopatu".