Asteburu euritsuetara ohitzen ari garen honetan, etxean geratu nahi ez eta oraindik plan ezberdinen bat egiteko asmorik duenarentzat, hitzordu ezberdinak eskaintzen ditu Euskararen Agendak.
Gaur bertan, esaterako, Arraia-Maeztun 'Matangi/Maya/M.I.A.' filma eskainiko dute, 19:00etan, udaletxean. Horrez gain, Sahararekiko Elkartasuna Adierazteko Europako Konferentziaren harira, Harresian Zulo, Postal kolekzionistak eta Iker Lauroba & Beste Urtaroak taldeek kontzertua eskainiko dute, Jimmy Jazz aretoan, 21:30etik aurrera.
Larunbatean ere askotariko hitzorduak izango dira. Autodefentsa feminista tailerra egingo dute Gasteizko Sorginenean, 10:00etatik aurrera. Besteak beste, ahalduntzea eta autoestimua landu edota gure gorputzen inguruan hausnartuko dute. Landatxo gizarte etxean, bestalde, 1620-2020: 400 urtez independentzia gabetuak hitzaldia eskainiko du Asisko Urmeneta marrazkilari eta irudigileak, 11:00etatik aurrera.
Igandean, Arantzabela Ikastolan izango da hitzorduetako bat. Izan ere, Igandeak Jai programaren barruan, Iraungorriko Marimiri antzerkia eskainiko dute Zurrunka teatroaren eskutik, igandean, 17:30ean. Ondoren, tailerra izango da (3-12 urte bitartekoentzat).
Bestelako ekintzak ere badira bai datorren aste bukaerarako, baita hurrengo asterako ere. Sartu Euskararen Agenda atalean eta kuxkuxeatu! Asteburu on!