Azterketa

Zazpi milatik gora basurde daude Araban

2016ko negutik bereziki igo da animaliaren populazioa.

Arabako basurdeen errolda jaso du Aldundiak 2018-2019 Basurdeen Kudeaketa Planaren barruan. Horren arabera, lurraldean, 7.200 eta 8.100 basurde artean dago; Badaia mendilerroa, Aramaio eta Lautada-Iparraldea dira dentsitate handiena dituzten zonaldeak. Gainera, 2016tik hona animalien kopurua nabarmen igo dela atzeman dute egindako ikerketan.

Azterketa horretan jaso dutenez, 2017-2018 kanpainan, guztira, 1.626 ehizaldi antolatu dituzte Araban, eta 3.353 basurde hil dituzte horietan, hortaz ehizaldien eraginkortasun maila %34koa dela ondorioztatu dute. Uxaldiak egiteko eskaerak ere nabarmen igo dira 2017. urtetik hona (%21,35), baina jaso bezala, "txikia da uxaldien eraginkortasuna".

Errepideetan eragiten dituzten trafiko istripuak nabarmen igo dira; izan ere, 2018an, istripuen %41,67 eragin zituzten. Basurdeekin istripu gehien dituzten errepideak dira Azazeta eta Kanpezu lotzen duen A-132, Gasteiz eta San Pantaleon de Losa arteko A-2622 eta bereziki igo dira istripuak A-624 errepidean, "Arabako Errioxan basurdeak izan duen hedapenagatik".

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide