Azaroaren 8tik 17ra arte, kafearen inguruko proposamen eta jarduerek hartuko dute Gasteiz. Zazpigarren urtez, Kafearen Astea ospatuko dute, kafea ezagutzera eman eta produktu horrekin lotutako enpresa lokalak dinamizatzeko.
Gasteizko Udala da ekimen honen babesle nagusia. 53 establezimenduk autore kafea prestatuko dute, eta kafea eta gozogintza batzen dituen ibilbideetan ere parte hartuko dute; Gasteizko baristen sorkuntza original eta berritzaileenak eta kafea eta artisau opilak eskainiko dituzte horietan, 2,5 euroan. Ostalaritzakoak ez diren 40 establezimenduk –ile-apaindegiak, estetika zentroak, etxetresna elektrikoen dendak, liburutegiak, gimnasio bat…— ere egin dute bat ekimenarekin, eta promozioak, aurkezpenak, dastatzeaz eta ikastaroak eskainiko dituzte.
Gasteizko erdialdean ez ezik, Pilar, Zabalgana, Zaramaga eta Salburua auzoetan, besteak beste, ere izaten du erantzun ona ekimenak, Maider Etxebarria Merkataritza zinegotziaren arabera: "Establezimenduen arteko lankidetza honi esker hiriak martxan eta bizirik jarraitzen du". Argibide guztiak webgune honetan ikus daitezke: Kafearen Astea