Pikara Magazine aldizkariak Bilboko bere egoitzan goizean jasandako erasoa salatu nahi du ALEA aldizkariko lantaldeak, eta lerro xume hauen bidez, bere elkartasun osoa adierazi nahi dio Pikara Magazine aldizkariko lantaldeari. Adierazpen askatasuna eta hedabideak libreki informatzeko dugun eskubidea urratzen dituzten erasoak direla salatu nahi dugu.
Kazetarien Euskal Elkargoak eta Euskal Kazetarien Elkarteak ere Pikara Magazine aldizkariak eta beste erakunde batzuk goiz honetan Bilbo Zaharreko plazako egoitzetan jasandako pintaketa "faxista eta anti-feministak" gaitzetsi dituzte. "EAEko kazetaritza arloko bi erakunde profesional nagusiek gogoratu nahi dute gizartea libreki informatzeko eta iritzi publikoa eraikitzen laguntzeko informazioa zabaltzea oinarrizko eskubide demokratikoa dela eta jarrera autoritario eta antidemokratikoetan aurre izango dituztela".
KEEk eta EAEk babesa luzatu diete Pikara Magazine eta kaltetuak izan diren komunikabide eta profesional guztiei, eta haienganako errespetu osoa eskatu dute.
Eraso gehiago
Sare Antifaxistak salatu duenez, pintaketa faxistak eta sexistak egin dituzte Bilbo Zaharra auzoko plazan eta Xake Espazioan, besteak beste, faxismoaren aurkako mural baten gainean. Espainiaren batasunaren aldeko mezuak jarri dituzte, eta DNJ eskuin muturreko taldeak sinatu ditu. Horrez gain, Sare Antifaxistako kide Eduardo Gonzalezen aurkako heriotza mehatxuak ere egin dituzte pintaketetan.
Azken asteetan, gainera, Irantzu Varela ekintzaile feministaren aurkako erasoak ere izan dira auzo berean: mehatxuzko pintaketak egin dizkiote lantokian, bere datu pertsonalak zabaldu dituzte sare sozialetan, eta sakelako telefonoaren bidez jazartzen ari zaizkio.