Hasi berria den erremolatxaren kanpaina azkena izan daiteke Araban. Izan ere, Miranda Ebroko (Burgos, Espainia) Azucarera enpresak hurrengo kanpainarako finkatu duen prezioa "ez da nahikoa landaketaren kostuak berdintzeko"; eta UAGAko nekazariek adostu dute erremolatxa gehiago ez landatzea.
Azucarerak tonako 26 euro eskaini ditu, gehi osagarri bat azukreak nazioarteko merkatuetan lortzen duen prezioaren arabera. Nekazarien kalkuluen arabera, berriz, prezio horretan hektarea bakoitzeko 500 euroko galerak izango lituzkete. "Gainera, osagarriaren prezioa ez dute zehaztu, eta azken egunotan beherantza doa", esan du sindikatuak.
Erremolatxa landatzen duten 94 ustiategik osatzen dute nekazarien sindikatuaren taldea, eta Mirandako fabrikan jarduten duen kolektibo handiena da. Izan ere, Azucarerak aurten kontratatu duen azaleraren %34,5 UAGA sindikatuko nekazariena da. Beraz, ereintzak utziz gero, fabrikaren etorkizuna ere baldintzatuta egongo litzateke.
Santi Lopez de Agileta UAGAko batzar sektorialaren kideak azaldu duenez, Azucarerak egin duen eskaintzarekin "landatzeko gogo gabe" gaude. "Ikusten ari gara ez ditugula kostuak berdinduko, eta horrela ezingo dugula erremolatxarekin jarraitu". Hortaz, multinazionalari negoziazioari berriz ekiteko eskatu dio.
Raul Beitia sindikatuko erremolatxa sektorearen lehendakariak adierazi duenez,erremolatxa landatzen jarraitu nahi dute "baina ez edozein preziotan". Beitiak azpimarratu du sektoreak inbertsio handiak egin dituela azken urteetan British Sugar multinazionalarekin lortutako akordioa betetzeko, eta ez dutela onartuko aldebakarreko erabakia. Tonako 30 euro ordaintzea eskatzen dute.