Ate joka dago asteburua berriro ere, eta hamaika ekintza ditu prest Euskararen Agendak.
Gaur bertan, besteak beste, rap feminista tailerra antolatu dute Zigoitian, 18:30ean, La Basu-ren eskutik. Hamaika urtetik gorakoentzat zuzenduta dago, eta Beldur Barik 2019 dinamikaren barruan prestatu dute. Sarrerak erosteko garaiz ibili direnek, Berri Txarrak taldearen kontzertuaz gozatzeko aukera izango dute, Amurrioko Burubio Kultur Elkartean, iluntzeko bederatzietatik aurrera. Taldeak Ikusi Arte Tourraren barruan eskainiko dituen kontzertu txikietako bat izango da gaurkoa.
Larunbatean, etxeko txikienek -eta ez hain txikiek- jostailu ez sexistak sortzeko aukera izango dute Izarrako Kultur Etxean antolatu duten tailerrean. 10:00etan hasiko da, eta hiru urtetik gorako umeei zuzenduta dago, familiarekin batera. Egun osoko egitaraua prestatu dute, bestalde, Kanpezun, Joaldun Festa dela eta. Tartean, joaldunen elkarretaratzea, erromeria eta bazkari herrikoia izango dira herriko kaleetan zehar.
Horrez gain, GEUrekin mendira taldeko lagunek Lokiz (San Kosme eta San Damian) ingurura irteera antolatu dute iganderako. Mendizorrotzako aparkalekutik abiatuko dira, 8:30ean. Arratsaldean, familientzako musika txotxongiloekin izango da Dulantzin, Fusionarte egitarauaren barruan. 18:00etan hasiko da Kontukantari ikuskizuna.
Hau aste bukaeran izango diren ekintzen lagin bat besterik ez da. Hitzordu gehiago ikusi nahi izanez gero, joan Euskararen Agenda atalera eta kuxkuxeatu!