Etxebizitzari buruzko topaketa izango da ostegunean, urriaren 3an, Landatxoko gizarte-etxean, eta gazteek, erakundeetako teknikariek eta politikariek hartuko dute parte. Euskadiko Gazteriaren Kontseiluak, Gasteizko Udalak eta Eusko Jaurlaritzak antolatutako topaketa hau 17:30ean hasiko da.
Etxebizitzaren Euskal Behatokiko azken datuen arabera, batez besteko alokairua 1070,1 eurokoa da udalerrian. Saio honetan hiru protagonista elkartuko dira etxebizitzaren gaia jorratzeko: gazteak, kargu politikoak eta teknikariak. Kasu honetan "gazteak eta etxebizitza" gaia izango da abiapuntua, etxebizitza berriak ezagutzeko eta etxebizitza-eredu berriak aztertzeko beharra dela eta: alokairu soziala, pisu solidarioak, 'co-housing'-a edo belaunaldien arteko etxebizitzak, besteak beste.
Topaketan parte hartu nahi duten gazteek www.egk.eus helbidean edo 688 737 092 telefono zenbakira deituta eman dezakete izena, doan.