Ikasturte berriarekin batera jende askok ekin dio euskara ikasteari, baina jakina da gehienetan eskola orduak ez direla nahikoak hizkuntza batean trebatzeko. Horretan laguntzeko, hainbat proposamen martxan daude aspalditik. Arabari dagokionez, hiriburuan Mintzalaguna egitasmoa da erreferentzia nagusia, eta Araban ere beste hainbat ekimen prestatzen dira. Horietan guztietan, lagun berriak egiteko eta hizkuntza praktikatzeko aukera ederra izaten da.
Ez da ordea, aukera bakarra. Edozein arrazoigatik hori egin ezin dutenentzat, edota horretaz gain mintzapraktika gehiago egin nahi dutenentzat, Mintzanet ekimena dago. Interneten bitartez egiten den jarduna da, ordenagailua, tableta edo sakelako telefonoa baliatuta. Horren bidez, euskara ikasten ari den lagun bat eta euskaraz ondo moldatzen den beste lagun bat harremanetan jartzen dituzte, asteroko hitzordu baten bitartez. Euskara praktikatu nahi dutenak bidelariak dira, gutxienez B1 maila dutenak. Bidelagunak, berriz, bidelariei laguntzeko prest dauden pertsonak dira. Une honetan, azken hauen bila ari dira, eta astean ordu erdi euskararen alde egiteko prest dagoen lagun orori deialdia egin diete, Mintzanet.net atarian izena eman dezaten. Ekimenaren arduradunek gogoratu dute ez dela titulurik behar, azken helburua baita lotsa galtzea eta hitz-jarioa lortzea.