Zortzi egun egingo ditu Amazonian Arabako suhiltzaile talde batek, bertako suteen kontrako lanetan. Hilaren 18ra arte izango dira oihana kiskaltzen ari diren suteak itzaltzeko beharretan; Gasteizko Udaleko eta Arabako Diputazioko suhiltzaileak diren Hector Perez, Ibai Navidad, Roberto Ogeta eta Mikel Mardones daude bertan, Acción Norte elkartearen ekimenez.
Bolivia eta Brasildik egindako eskariaren ondotik joan dira Arabako suhiltzaileak, hurrengo asteartera bitartean, eta Costa Rican eta Panaman aritu diren beste suhiltzaile arabar batzuekin elkartu dira han; guztira, bederatzi lagun ari dira taldean. Amazoniak bizi duen tragediari aurre egiteko, hurrengo egunetan beste hainbat suhiltzaile bidaltzea ere ez du baztertzen Acción Nortek.