Bihar eguerdian igaroko da Espainiako Vuelta Gasteiztik

Bihar eguerdian, 14:00etatik 15:00 bitartean, igaroko da Gasteiztik Espainiako Vuelta. Ibilbideak Brusela ibilbidea, Salburua bulebarra, Hezeguneen ibilbidea, Betoñuko atea eta Bergarako atea hartuko ditu, eta trafikoan eragina izango du.

Ibilbidea txirrindulariak igaro baino minutu batzuk lehenago itxiko dute, eta lasterketa hiritik ateratzen denean irekiko dute berriz ere. Hala ere, publizitate karabanak eta taldeetako kotxeek gainera, bide bera egingo dute 13:00etatik aurrera, ibilbide inguruko kaleetan trafikoa nabarmen ugarituz. Betoñuko industrialdeari dagokionez, ibilbideko garaje, enpresa, lantegi eta pabiloietako sarrera eta irteerei ere eragingo die.

Espainiako Vueltako beste edizio batzuetan Euskal Herriko zenbait tokitan gertatu den bezala, Hau Euskal Herria da! lemapean protesta egiteko deialdia luzatu dute hainbat eragilek. Hitzordua 14:00etan egin dute La Dunako biribilgunean (Zurbaoko Atea kalean), eta bertara hurbiltzen diren lagunei, ikurrinak edo bestelako aldarrikapenak eramateko gonbitea egin diete.

Araban zehar, Bilbora bidean

2019ko Vueltaren hamabigarren etapa Nafarroako Zirkuituan hasiko da eta Bilbon amaituko. Guztira 171,4 kilometro egingo ditu, tartean Azazeta gaina igota, eta, besteak beste, Andollu, Dura, Uribarri-Ganboa eta Landatik pasata.