Abuztuaren 4tik 9ra salaketak jasotzeko gune bateratua egongo da aurten, Olagibel kaleko Ertzaintzaren komisaldegian; Santiago ospitalearen aurrean, hain zuzen. 24 orduz irekita egongo da komisaldegia, eta bertan Ertzaintzak eta Gasteizko Udaltzaingoak arreta zerbitzua emango dute. Gasteizko Udalaren arabera, erabakiak "arreta hobetzea" eta baliabideak "herritarrengana hurbiltzea" du xede. Udalak eta Segurtasun Sailak iaz izenpetu zuten hitzarmenaren barruan kokatu dute ekimena, eta bi polizien artean osatu duten koordinazio batzordeak hartu du erabakia.
Hortaz, delituren baten biktima diren herritarrek ez dute Agirrelandako egoitzara joan behar izango salakera jartzera. Ertzaintzaren egoitzan egongo diren udaltzainek ordenagailu eramangarrietan jasoko dituzte salaketak, eta ondoren Udaltzaingoaren aplikatibora eramango dute, bertan gordetzeko.
Argitu dutenez, polizia bakoitzaren eskumenen arabera eta herritarrak salatu nahi duen delitu motaren arabera bideratuko dute salaketa bakoitza. Modu berean, kontuan hartuko dute ere salaketaren inguruan aurreko polizia ikerketaren bat irekita dagoen, eta polizia bat edo bestea aukeratzeko herritarrek izan ditzaketen lehentasunak ere kontuan hartzen "ahaleginduko" direla ziurtatu dute.
Salaketak hurrenkeraren arabera artatuko badituzte ere, gogoratu dute lehentasuna izango dutela sexu-askatasunari lotutako salaketek, eta baita genero indarkeriari lotuta daudenek ere.