Salburua auzoa eta Uribarri-Arratzua artean goi-tentsioko linea berri bat jarri nahi du Iberdrolak. Instalazioa airekoa izango da Zurbaoraino, eta Arkautin lurperatuko dute, Gasteizko hirian sartzeko. Zurbaoko Batzar Administratiboak ohartarazi du Iberdrolaren asmoak herrian eragingo duen kalteaz, eta dagoeneko 130 alegazio aurkeztu dituzte bizilagunek proiektuaren kontra.
Halaber, Eusko Jaurlaritzaren eta Arabako Foru Aldundiaren agintariekin bildu da Batzar Administratiboa. "Erakundeen babesa eskatzen dugu. Benetan biodibertsitatearen alde, pertsonen alde eta ingurumenaren alde baldin badaude hitz politak non geratzen diren ikusi nahi dugu; ez da onargarri hiriburutik kanpo bizi garen pertsonak baztertzea, eta landa eremuak aurrera egitea nahi badugu, errespetua eskatzen dugu eta gure lur emankorrak ez hondatzea".
Fernando Murillo Zurbaoko Batzar Administratiboko lehendakariak azaldu duenez, goi-tentsioko linea berriak are gehiago bakartuko du herria: "Iparraldeko autobia dugu, beste goi-tentsioko linea handi bat herritik gertu, Abiadura Handiko Trena mendebaldetik, eta orain, ekialdean, argindar sare bikoitza egin nahi dute". Sarearen banaketa egiteko, Iberdrolak hamabost argindar-dorre eraikiko ditu sare bakoitzeko. Aurkeztu dituzten alegazioetan, Zurbaoko bizilagunek gogoratu dute goi-tentsioko lineak lurperatzeko proiektuak daudela.