Nazioarteko artisten eta konpainien hamalau ikuskizun biltzen dituen programazioa aurkeztu du Araia-Asparreneko Umore Antzerkiaren XXVI. Jaialdiak. Gainera, aurten, Arabako hogei bat herritara helduko da, abuztuan. Edizio berri honen helburua iaz izandako arrakasta errepikatzea da; izan ere, 10.000 ikusle baino gehiago izan ziren eskainitako emanaldietan.
Ana del Val Arabako Kultura eta Kirol saileko foru diputatuak, Gotzon Lopategi Asparreneko Udaleko Kultura zinegotziak eta Javier Alkorta jaialdiaren zuzendariak gaur aurkeztu dute programa. "Kalitatea eta aniztasuna" nabarmendu dute hirurek. Komedia beltza, bakarrizketak, clown-a, zirkua, musika, amodio kontuak, gorputz hizkuntza eta antzerki klasikoa izango dira 2019ko kartelaren osagaietako batzuk.
Araia izango da erreferentziazko agertokia, abuztuaren 14tik 18ra bitartean, hamaika emanaldi hartuko baititu: bost egingo dira Arrazpi Berri kiroldegiaren barruan; eta Araiako kaleak eta plazak agertoki inprobisatu bihurtuko dira, eta aire zabaleko sei ikuskizun hartuko dituzte
Jaialdia Txalo Produkzioak konpainiaren Zoaz pake santuan lanak inauguratuko du; Mikel Laskurain eta Ane Gabarain aktoreek antzeztutako euskarazko komedia beltza. Abuztuaren 14an izango da, 22:30ean. Abuztuaren 15ean, berriz, Ay Teatro konpainiak Todas hieren y una mata lana eskainiko du; abuztuaren 17an, Nacho Novo aktorea izango da protagonista, El cavernicola lanarekin; eta barruko ikuskizunak amaitzeko, abuztuaren 18an, Un poyo rojo lana taularatuko da izen bereko konpainiak.
Araiako XXVI. Jaialdiaren programa osoa HEMEN kontsultatu dezakezu; herrietako emanaldiak ere HEMEN dituzu ikusgai.