Txernobylgo hondamendi nuklearrak kaltetutako ehun bat umeri eta udan zehar harrera egiten dieten arabarrei ongietorria egin diete gaur goizean, Diputazioaren jauregian. Politikariez gain, haurren harrera antolatzen duten elkarteek ere parte hartu dute ekitaldian: Sagrada Familia, Izaki eta Chernobileko Umeak izenekoak.
Joan den uztailaren 1ean iritsi ziren Euskal Herrira 189 haur eta gazte, eta abuztuaren 28ra arte egongo dira gurean. Euskal Herrian dauden bitartean, mediku arreta jasotzen dute Ukrainatik eta Bielorrusiatik etorritako bisitari gazteek, eta ekimen ugaritan parte hartzen dute ere. Joan den ostiralean, esaterako, Gatz Haranean egon ziren, ingurunea ikusteko eta gatzaren ekoizpenaren berri izateko.
1986ko apirilaren 26an eztanda egin zuen Txernobylgo zentral nuklearrak, Ukrainan, Bielorrusiako mugatik gertu, eta inguruan bizi diren biztanleek oraindik pairatzen dituzte istripu horretan sortutako ondorioak.