Beste urte batez, jazzarekin emango diote hasiera udari Gasteizko Alde Zaharrean. Jazzaharrean jaialdia izango da lehendabizikoa uztaileko lehenengo astean. "Ekitaldiak beti bezala, eta aurten arrazoi gehiagoz, Gasteizko Alde Zaharreko tabernetan izango dira. Kontzertu gune hauek, hurbiltasuna medio, harreman estua sorrarazten dute musikari eta ikusleen artean, eta arrazoi nahikoa da tabernetako kontzertu eta ekitaldiak sustatzeko", azaldu dute antolatzaileek.
Jazza, bluesa, soula eta funka izango dira nagusi hurrengo egunetan, bertako eta urruneko musikarien eskutik. Asteartean, hilaren 2an, izango da lehenengo hitzordua Pettirekin; blues errritmoak ekarriko ditu beratarrak, 20:30ean, Parral tabernan.
Gurutze's Manouches (3an, Orain tabernan), Marta Mansilla eta Jabi Sanchez (4an, Dazz tabernan), Blue Matter (4an Bodegon tabernan), Late Night Jazz Jam Session (5ean, The Garage tabernan), Discipulos de la Clave (6ean, Botxon), Four Foxes (6an, Falerinan), Moni Garage (7an, Jangon) eta Johnny & The Blues (9an, Parralen) taldeak etorriko dira hurrengo egunetan.