Aurtengo Araba Euskaraz abiatu da dagoeneko. Goizeko hamarretan egin dute hasiera ekitaldia, eta, ohi bezala, ibilbidearen irekiera ofiziala egin dute ondoren, hezkuntza munduko eragileak eta erakundeetako ordezkariak lagun.
Egunari hasiera emateko modurik hoberena "egongelako ateak" irekitzea dela nabarmendu du Armentia Ikastolako zuzendari Agurne Barrusok, eta, horretarako, etxe baten egongela irudikatu dute ekitaldian. Txan magoaren laguntza izan dute oholtzan, aurkezle lanetan.
Xabier Arrieta Ikastolen Elkarteko presidenteak Arabako ikastolen egoeraren errepaso arina egin du, eta, bereziki, Arabako Errioxan eta Trebiñun egindako lana goraipatu du. Bestalde, Ikastolako presidente Liher Larreak gogoan izan du hautaprobak egin berri dituen ikastolako lehen promozioa. "Etorkizun oparoa" opa die, txalo zaparrada baten laguntzarekin.
Ibilaldiari ekin baino lehen, "bihar ere ikastolaren ateak irekita" egongo direla gogoratu du Agurne Barrusok.