Lehen Hezkuntza, Bigarren Hezkuntza eta Haur Hezkuntzako 19.549 ikasle Beñat Etxepare antzokira ekarri dituen antzerki programazioari amaiera eman diote sari banaketa batekin; ikasturtean eginiko kritika eta irudi onenei sariak eman dizkiete Gasteizko Udalak eta Teatro Paraisok sustatutako egitasmoan.
Gainera, 25 urte bete ditu Beñat Antzokiak, eta, ospatzeko, nazioko eta nazioarteko, zein lurraldeko egitasmoak barne hartzen dituen programazio berezia antolatu dute. "Denbora honetan ikusleak sortzea eta trebatzea xede duen laborategi berritzaile hau garatzeko konpromisoa hartu duten artistak eta konpainiak ezagutzeko eta eskertzeko ariketa izan da", azaldu dute sustatzaileek.
Proiektuak haur, gazte eta irakasleei arte eszenikoen eta hezkuntza artistikoari buruzko jakin-mina pizteko helburua du; 25 urtez, 2500 saio baino gehiago egin dituzte, eta 600.000 ikusle baino gehiago bildu dituzte. "Esperientzia estetikoak eta elkarlaneko proiektuek eragindako gozamena, kultura ekoizpenaren garapena eta pentsaera dibergentea bultzatu ditugu, baita gure lurraldeko hezkuntza eta arte praktiken eraldaketa ere", nabarmendu dute Teatro Paraisotik.