16.090 haur jaio ziren 2018. urtean Araban, Bizkaian eta Gipuzkoan, aurreko urtean baino 986 gutxiago, hau da, %5,8ko jaitsiera izan da jaiotzen kopuruan. EUSTATek astelehenean argitaratu ditu 2018ko jaiotzen behin behineko datuak, eta horren arabera, jaiotzen jaitsiera nabarmenena Araban jazo da, %9,4 gutxituta, 279 jaiotza gutxiago izan baitziren; Bizkaian %6,8 gutxitu ziren jaiotzak (581 jaiotza gutxiago), eta Gipuzkoan %2,3 (126 jaiotza gutxiago).
Jaiotzak adinaren arabera banatuta, nabarmentzekoa da 2018ko laugarren hiruhilekoan, 35-39 urteko amen portzentajea handitu dela eta talde nagusia bilakatu dela (%35,6); ondoren datoz 30-34 urteko amen taldea, jaiotzen %34,4rekin, eta 25-29 urtekoa, %12,5ekin. 40 urte baino gehiago dituzten amak (%11,3) gehiago izan ziren 25 urtez beherakoak (%6,2) baino.