Lurraldeko maparen bi muturretan daude Arabako erlezainik onenak, Kanpezun eta Gaubean hain zuzen ere. Bi udalerri horietako eztiek irabazi baitute Arabako APIAL elkartearen XXIV. txapelketa. Fernando Diaz Moralesek eraman du lehen saria Antoñanara, eta Begoña Diaz de la Presak eta Samuel Etxebarriak bigarrena eta hirugarrena, Fresnedara.
Aurten, lehenbiziko aldiz, Gasteizko Abastos Plazan egin dute txapelketa, publikoaren aurrean, lurraldeko eztia ezagutarazteko asmoz, eta 430 bazkide dituen sektoreari ikusgarritasuna emateko. Hala, sariak ematearekin batera, eztiaren dastaketak egin dituzte.