Arabako Foru Aldundiak, Gasteizko Udalak, Ume Sahararrak Hartzeko Familien Arabako elkarteak (Afanis) eta Euskadiko Frente Polisarioaren Ordezkaritzak Arabako familiei dei egin diete, uda honetan Saharako errefuxiatuen kanpamentuetako haurrak euren etxeetan hartzeko. Aurreikusten dute aurten haur askok parte hartuko dutela programan, eta, ondorioz, haurrak hartzeko prest dauden familia gehiago behar dira.
Oporrak Bakean harrera-programaren barruan, laguntza medikua eta elikadura orekatua ematen zaizkie umeei, eta, halaber haur sahararren eta arabarren arteko kultura-trukea sustatzen dute. Algeriako Hamada izenez ezagutzen den Sahara basamortuko eremuko errefuxiatu-kanpamentuetan bizi dira umeak urte osoan, bizitzeko eremurik latzenetan, egoera eskasetan eta 1975az geroztik dirauen behartutako erbestealdian. Programaren bidez, atseden bat eman nahi zaie umeei, eta Sahara basamortutik atera ahal izateko aukera bat udako hiletan, bertan 55 gradutik gorako tenperaturak izaten baitira. Araban ematen dituzten bi hilabete horiek funtsezkoak izaten dira, gainera, etxera indarberrituta itzultzeko, eta, hala, indartsuago aurre egin diezaioten urtearen gainerakoari.