Plataforma berriaren helburua da iaztik Toloño Mendilerroa toponimo ofiziala dena baztertzea eta horren ordez, Kantabriako Mendilerroa berreskuratzea. Bastida eta Lapoblacion (Nafarroa) herrien arteko inguruneari eragingo lioke.
Guardian aurkeztu zuten atzo Arabako Errioxako, Mendialdeko eta Errioxako hainbat udalez eta 14 elkartez osatutako plataforma berria; tartean, Guardiako Adiskideen Elkartea, Lezako Mahaia edo Mendialdetik daude. Aurkezpenarekin batera, izen aldaketaren aldeko manifestu bat ere ezagutarazi zuten; dagoeneko bestelako udal eta elkarteen atxikia lortu duena.
Sustapen Ministerioaren menpeko Espainiako Institutu Geografikoak ontzat jo zuen iragan abuztuan Toloño Mendilerroa toponimoa, eta Kantabria Mendilerroa bigarren mailako aldaera bezala baztertu zuen "erabilera gutxi eta mugatua" duelako. Atzoko agerraldian Espainiako Institutu Geografikoaren jarrera arbuiatu zuten; besteak beste, izen aldaketa udalekin ez kontsultatzeagatik.
Ebazpena bertan behera utzi dezatela eskatu zuten. Jakinarazi zuten sinadura bilketa jarri dutela martxan; hilabete osoa emango dute bi kuadrilletako eta Errioxako herrietan sinadurak jasotzen. Horrez gain, bestelako ekimenak ere antolatuko dituztela iragarri zuten aurkezpenean.